Minnisblað um grunnskólalög

31.05. 2006                                                                                         

Fundur hjá menntamálaráðuneyti vegna endurskoðunar grunnskólalaga      

Framtíðarsýn í málefnum grunnskólans

Skóli framtíðarinnar er skóli án aðgreiningar þar sem þörfum barna með ólíkar þarfir er mætt og náin samvinna er á milli foreldra og margra fagstétta sem annast barnið á skólatíma.

Hvaða meginsjónarmið ætti að hafa að leiðarljósi við endurskoðun grunnskólalaga?

1.      Skóli án aðgreiningar í raun

·             Efla þarf kennslu og símenntun kennara og annars starfsfólks skóla um sérþarfir barna.

·              Leggja þarf áherslu á að innleiða hugmyndafræði og starfsaðferðir skóla án aðgreiningar meðal fagfólks og annarra starfsmanna skóla.

·              Innan skólans þarf að starfa fólk með fjölbreyttan bakgrunn og þekkingu til að útfæra skóla án aðgreiningar í verki (auk kennara og sérkennara má nefna stuðningsfulltrúa, þroskaþjálfa, sálfræðinga, sjúkra- og iðjuþjálfa).

·              Efla þarf þverfaglega samvinnu mismunandi starfsstétta innan skólans.

2.      Ólíkum þörfum barna sé mætt

·              Einstaklingsmiðuð námsskrá sé unnin í samvinnu fagfólks og foreldra.

·              Skólastarf þarf að vera sveigjanlegt með misjafnlega stórum hópum, einstaklingsmiðuðum námskröfum, aðlöguðu námsefni, fjölbreyttum kennsluaðferðum, möguleika á einstaklingskennslu og möguleika á aðlögun rýmis að mismunandi þörfum barna.

·              Þegar barn með sérþarfir hefur skólagöngu, eða sérþarfir þess verða síðar ljósar við greiningu, þarf sérstakt ferli að fara í gang þar sem unnið er markvisst að því að laga nám og skólaumhverfi barnsins að þörfum þess.

·              Kennsla í félagsfærni falli undir sérkennslu.

·              Sjúkraþjálfun, iðjuþjálfun og talþjálfun þurfa að geta farið fram innan skólans og fallið inn í venjulegan skóladag barna með sérþarfir.

·              Tryggja þarf öryggi barna með sérþarfir í skólaakstri. Ljóst þarf að vera hver greiðir kostnað vegna aksturs milli skóla og annarra staða þar sem börn njóta þjónustu.

3.      Virk samvinna við foreldra

·              Foreldrasamvinna um nám og líðan barna í skólanum sé skilgreind og kynnt.

·              Foreldrar barna með sérþarfir taki þátt í gerð einstaklingsnámsskrár fyrir sitt barn og eigi fulltrúa við gerð skólanámsskrár.

·              Foreldrar séu boðaðir á fundi þar sem mál barna þeirra eru til umfjöllunar t.d. hjá nemendaverndarráði.

·              Kvörtunar- og kæruleiðir foreldra vegna óánægju með nám og aðstæður barns í skóla séu skilgreindar og kynntar.

·              Verði misbrestur á skólasókn barns, sbr. 3. gr. fyrirliggjandi frumvarps til laga um breytingur á 6. gr. laga nr. 66/1995, ætti skólastjóri að leita leiða til úrbóta í samvinnu við forráðamann barnsins og sérfræðiþjónustu viðkomandi sveitarfélags áður en leitað er til barnaverndarnefndar.

4.      Heimakennsla / sjúkrakennsla

·              Skilgreina þarf kennslu fyrir börn sem geta ekki sótt skóla tímabundið eða til lengri tíma vegna andlegra og/eða líkamlegra veikinda.

·              Eftir málsatvikum hverju sinni þarf slík kennsla að geta farið fram á sjúkrastofnun, í sérstöku húsnæði innan skóla eða inni á heimilum barnanna.